ក្រសួងទេសចរណ៍ជំរុញបង្កើតសហគមន៍ទេសចរណ៍ឲ្យបានច្រើន នៅចុងឆ្នាំនេះ
- ភ្ញៀវទេសចរ: ៩ខែ២០០៨មានចំនួន១.៣៩៨.៥៥៧នាក់
ភ្នំពេញ៖ តាមតួលេខពីក្រសួងទេសចរណ៍បានឲ្យដឹងថា ក្នុងរយៈពេល៩ខែឆ្នាំ២០០៨នេះ ចំនួនភ្ញៀវអន្តរជាតិបានមកទស្សនាកម្ពុជាមាន១.៣៩៨.៥៥៧នាក់ គឺកើនបាន១០ភាគរយ បើប្រៀបធៀបទៅនឹងរយៈពេលដូចគ្នានាឆ្នាំ២០០៧។
ភ្ញៀវទេសចរជនជាតិកូរ៉េនៅតែឈរលំដាប់ច្រើនជាងគេក្នុងចំណោម ភ្ញៀវជនជាតិដទៃៗទៀត។ ឆ្នាំនេះ ទោះបីជាប្រទេសថៃកើតមានភាពចលាចលរង្គោះរង្គើយ៉ាងណាក្ដី ក៏មិនធ្វើឲ្យមានផលប៉ះពាល់ណាមួយលើស្ថិរភាពភ្ញៀវទេសចរមកទស្សនា កម្ពុជានោះទេ។ ឧស្សាហកម្មគ្មានផ្សែងមួយនេះ នៅតែដំណើររៀបចំផែនការអភិវឌ្ឍន៍ពង្រឹងការផ្សព្វផ្សាយទៅកាន់ទី ផ្សារទេសចរណ៍ធំៗនៅលើពិភពលោក។ ការពង្រឹងគុណភាពសេវាកម្មទាំងឡាយក្នុងវិស័យនេះនៅតែជាចំណុចរសើប របស់ក្រសួងដែលត្រូវយកចិត្តទុកដាក់ជាប្រចាំ។
ក្នុងកិច្ចប្រជុំត្រួតពិនិត្យពិនិត្យការងារ៨ខែ នៅទីស្ដីការក្រសួងកាលពីថ្ងៃទី៨ ខែតុលា ការកន្លងទៅនេះ លោក ថៅ ខុន រដ្ឋមន្ត្រីក្រសួងទេសចរណ៍បានលើកឡើងអំពីទិសដៅចុងឆ្នាំ២០០៨ ខាងមុខនេះដែលជារដូវរំហើយរដូវអស់ភ្លៀងធ្លាក់ដែលផ្ដល់ឱកាសល្អ ដល់ភ្ញៀវទេសចរចូលមកទស្សនាបានច្រើន។ ក្រសួងបានរៀបចំបង្កើតឲ្យមានកម្មវិធីធំៗសម្រាប់ទាក់ទាញភ្ញៀវ ទេសចរធំៗ។ ពិសេសភ្ញៀវមកពីអឺរ៉ុប មកពីសហរដ្ឋអាមេរិកដែលគេស្វែងរករមណីយដ្ឋានស្អាតៗល្អប្រណីត មានទេសភាពធម្មជាតិស្រស់ត្រកាលក្នុងឱកាសប្រទេសទាំងនេះកំពុង ធ្លាក់ព្រិលខ្លាំង។ ចំពោះមុខគឺការបើកយុទ្ធនាការផ្សព្វផ្សាយអំពីកម្ពុជា Cambodia-Kingdom of Wonder។ ចលនាប្រឡងប្រណាំងទីក្រុងស្អាតរមណីយដ្ឋានស្អាត សេវាល្អ។ ការរៀបចំបង្កើតសហគមន៍ទេសចរណ៍មូលដ្ឋានខេត្ត ក្រុង ដែលមានសក្ដានុពល។ ការប្រកួតកីឡាវាយកូនហ្គោលអាស៊ីលក្ខណៈអន្តរជាតិ លើកទី២ (Johnnie Walker Cambodia Open2008) និងការរត់ប្រណាំងពាក់កណ្ដាលម៉ារ៉ាតុងនៅខេត្តសៀមរាបនាខែធ្នូ ឆ្នាំ២០០៨ខាងមុខនេះ។
ចុងឆ្នាំនេះក្រសួងទេសចរណ៍នឹងជំរុញឲ្យមន្ទីរទេសចរណ៍តាមខេត្ត ក្រុងសហការជាមួយអាជ្ញាធរខេត្ត ស្វែងរកដៃគូអភិវឌ្ឍន៍ ដើម្បីបង្កើតសហគមន៍ទេសចរណ៍ឲ្យបានច្រើនកន្លែងបន្ថែមសំដៅលើកម្ពស់ ប្រសិទ្ធភាពសេដ្ឋកិច្ចដោយផ្ទាល់ដល់សហគមន៍ ជនបទដោយមិនបាច់ឆ្លងកាត់សេវាបម្រើច្រើនដំណាក់។ ភ្ញៀវទេសចរប្រមាណ៥០ភាគរយនៃចំនួនភ្ញៀវដែលមកទស្សនានៅកម្ពុជា គេចូលចិត្តទៅលេងកម្សាន្តនៅតំបន់សហគមន៍ទេសចរណ៍ទាំងនេះ។ បច្ចុប្បន្ននេះកម្ពុជាមានឧទ្យានជាតិចំនួន៧ តំបន់អភិរក្ស២៣ និងតំបន់ទេសចរណ៍សហគមន៍នៅខេត្តក្នុងភូមិភាគឦសាន ខេត្តកោះកុងជាដើម៕
0 comments:
Post a Comment